Pamamaalam sa Pamantasan: Unang Bahagi

Kay bilis nga naman lumipas ng panahon, biruin mo, apat na taon na pala ang inilagi ko sa iyo. Napakaraming alaala, marami nga dito nabaon ko na sa limot. Pero kung mag-babalik tanaw ako sa nakalipas na apat na taon... hay, masaya, napakasaya.. ang buhay sa kolehiyo ay ang pinakamakulay na yugto ng buhay ko.


Pambungad: Welcome sa Pamantasan

Biyernes noon, hindi ko na maalala ang eksaktong petsa, pero narinig kong pumasa daw ako sa PLMAT. Walang reaksyon lumabas sa aking mukha, sa simula't sapul, hindi ko naman talaga gustong mag-aral sa isang pampublikong paaralan. Biglang pumasok sa isipan ko ang kasunduan namin ng aking mga magulang na kapag pumasa ako sa Pamantasan, doon at doon ako mag-aaral.

Upang makatiyak, agad akong sumugod sa Intramuros upang makita ang listahan ng mga pumasa. Aba'y naroon nga ang pangalang Cultura, Ivan B. Hindi ko alam kung matutuwa ako sa nabasa ko. Kasi naman, sa loob ng sampung taon, nag-aral ako ng elementary at high school sa isang paaralang pribado at pinapalakad ng mga kaparian at madre. Paano na ang airconditoned rooms, paano na ang pangarap kong unibersidad dito sa España, paano ako makikisalamuha sa mga mahihirap na estudyante? - ito ang mga katanungang agad na bumagabag sa aking isipan.

Wala na akong nagawa, nang dumating ang enrollment, inasikaso na ito agad ng aking nanay. Welcome sa Pamantasan.


Yugto I: Unang Taon sa Pamantasan

Unang araw sa kolehiyo, may kakaibang kaba akong nararamdaman sa dibdib. Pano ba naman kasi, first subject ko kaagad ang College Algebra, tapos propesor ko pa sa subject na ito ang isa sa tatlong tinagurian Math Terror ng PLM (Perez, Lucas, Macasheb). Itatago ko na lang sa pangalang Angelita Perez, ang matandang propesora sa math, unang meeting ay may lesson kami agad. Haay, ilang beses na rin ako pinagalitan ng matandang propesora (tamad kasi ako gumawa ng takdang-aralin). Pero kahit may angking kasungitan ang matandang propesora sa math, henyo siyang maituturing pagdating sa mga numero.

Culture shocked pa ako sa unang semestre, paano ba naman kasi, makakarinig ka na lang bigla ng malulutong na P*T*NG *NA at T*ARANT*DO sabay hampas sa balikat, ganoon pala sila magbatian sa Tondo. May ilan ding kamag-aral na namamangha kapag naglabas ka ng isang mamahaling gamit, at bigla na lang magsasabing, "Ang yaman mo naman..."

Masuwerte ako't naka-ligtas ako sa pagpapahirap ng ROTC. Maaga akong pumila at nag-enroll sa CWTS para lang maka-iwas sa matinding training na dinadanas ng mga ROTC. Pero may inggit akong nararamdaman sa tuwing makikita ko ang mga estudyanteng nakabilad sa field. Ewan ko kung bakit. 

Hindi ko alam kung matutuwa ako sa mga nagaganap sa aking paligid. Kaya naman kapag break time, lalabas ako at magtutungo sa pader ng Intramuros upang magmuni-muni. Halos ganito ang naging routine ko sa araw-araw ng buong 1st semester, papasok sa klase, magtatanong ng mga assignment, tatambay sa pader ng Intramuros. Hindi ako madalas nakikipag-usap sa mga kamag-aral ko, abnormal ako e, isa akong introvert na bata.

Nasaan na kaya si Aidle Joy? siya kasi ang paborito kong kamag-aral. Siya ay tubong Lubang Island, Occidental Mindoro. Hindi siya kagandahan, pero hndi naman siya sukdulang pangit, tamang pangit lang. Isa siyang natural na promdi kaya naman tuwang tuwa akong inaasar siya. Hindi kumpleto ang araw ko kapag hindi ko siya inaaway. Tama, naging bully niya ako. ang nakakatuwa lang ay hindi siya napipikon kahit anong gawin kong pang-aasar sa kanya. Napaka haba ng kanyang pisi. Minsan hinihiya ko siya sa buong klase pero parang wala lang sa kanya, uungol lang siya ng kakaibang tunog na sa kanya mo lamang maririnig.

Hindi ko rin malilimutan na sumapi ako sa isang school org na maka-Diyos. Alam ng lahat ng nakakakilala sa akin na hindi likas sa pagkatao ko ang magsimba tuwing linggo, ang magdasal bago kumain, bago matulog at kahit na kailan pa man (parang hndi galing sa parochial school no?), for short hindi ako relihiyosong tao. Pero ewan ko nga ba't napajoin ako sa org na iyon. Merong sharing, umaattend ng misa sa tanghali. Ayoko na!

Isa pang hindi ko malilimutan noong unang semestre ng unang taon ko sa kolehiyo ay ang muntik ko nang pag-sapi sa grupo ng kabataan aktibista. Haha, dahil sa isang project sa Social Science, napa-join kami sa isang rally ng mga estudyante upang i-dokyument ang kaganapan. Habang nasasaksihan namin ang mga pinapalo at tinutulak na mga rallyista, napansin kong takot na takot ang mga kagrupo kong nagdo-document ng kaganapan, samantalang ako naman ay tuwang tuwa at nae-excite. Baliw ata talaga ako, o sadyang thrill seeker lang.

Hindi ko na maalala ang iba pang kaganapan sa unang semestre. Kahit nga pangalan ng mga kamag-aral ko'y hindi ko na rin matandaan.

Dumating ang ikalawang semester ng unang taon ko sa Pamantasan, panibagong mukha na naman ang aking makakasalamuha, shinaffle kasi lahat ng blocks pag-pasok ng 2nd sem. Hindi ko na kaklase si Aidle Joy, wala na ako naaasar. Ako'y naging isang tahimik at masunuring bata.

Wala masyadong tumatak sa isipan ko sa ikalawang semestre, bihira lang ako nakisalamuha sa mga kamag-aral ko, naging Bahay-Pamantasan-Bahay ang ruta ko sa araw-araw. Siguro angh hindi ko makakalimutang kaganapan noon sa 2nd sem ay yung nadulas ako ng dalawang beses sa gitna ng seryosong discussion sa Trigonometry, maging ang propesora namin ay napahagikgik. Kahit ako ay hindi ko rin naiwasang tumawa ng malakas.     


Dahil kami ay nasa ilalim ng General Education Program, wala pa kaming kursong kunukuha sa buong unang taon namin. Puro gen-ed subject ang aming kinukuha. Makakapili lang kami ng kursong gusto namin sa oras na magtapos ang Unang Taon. Kaya naman nang dumating ang panahon na iyon na kailangan na namin pumili ng course, naisip ko kaagad na kunin ang BS Biology sapagkat pangarap kong maging isang ganap na Doktor ng Medisina.

Dalawang magulong semestre ang lumipas. Ilang kaibigan ang nakilala at nakalimutan na. Natapos ko ng matagumpay (nakalampas ako sa Trigonometry at Algebra). Masaya kong nilisan ang aking Unang Taon sa Pamantasan.

_________________________________________________________________

Pamamaalam sa Pamantasan: Ang Kuwento ng Aking Buhay Kolehiyo

Unang Bahagi

Ikalawang Bahagi

Ikatlong Bahagi

.