Pag-ahon

Sa pagyao ng kahapon, at pagkahimlay ng kaligayahan,

binubulong sa sarili't lubusang inaasam

pag-ahon sa kabunduka't paghimbing kasama ng kalikasan.

Nais nang mapakinggan muli, mga kuliglig at paghuning kagiliw-giliw,   

lagaslas ng batis, at maging pagsipol ng hangin.

Mga mumunting tinig na kailanma'y 'di magmamaliw.

Nais ding muli, masilayan ng mga matang nangungulila

tayog ng punong kahoy, at lawak ng luntian, 

mga banging matatarik at nakalulula.

Anumang sukal ng kagubata'y buong tapang na tataw'rin, 

kung kapalit nama'y kagandahan,

at husay ng Kanyang likhain.

Anumang tayog ng kabunduka'y pilit ding maaabot

kung kapalit din nama'y tagumpay,

kaligayahan ang maidudulot.

At nang  makitang lubos ang ganda ni Inang Kalikasan

Sa sarili'y ibinulong, "bakit pa babalik sa mundong kinagisnan,

kung dito nama'y nahanap na ang tiyak na kapanatagan?"

Pag-ahon

-IBC

Takipsilim sa Bundok Maculot